Սամվել Մարտիրոսյանը տեղեկատվական և կիբերանվտանգության, մեդիագրագիտության, ապատեղեկատվության դեմ պայքարի և ռազմավարական հաղորդակցության ոլորտների մասնագետ է։ Ունի երկարամյա մասնագիտական, հետազոտական և դասավանդման փորձ՝ համագործակցելով պետական, մասնավոր, միջազգային և հասարակական կազմակերպությունների հետ։
Ներկայումս CyberHUB-AM կիբերանվտանգության խմբի համահիմնադիրն ու տնօրենն է, ArmSec հիմնադրամի տնօրենը, Ardy Academy-ի թվային մարքեթինգի ֆակուլտետի դեկանը, eqwefy ընկերության տեղեկատվական անվտանգության գծով տնօրենը և Media Diversity Institute – Armenia կազմակերպության ծրագրի ղեկավարը։ Նա նաև Հայաստանի Հանրապետության ինտերնետ կառավարման խորհրդի անդամ է։
2020 թվականից համագործակցում է Հայաստանի հանրային հեռուստատեսության հետ՝ որպես «Մեդիագրագիտություն» հաղորդման հեղինակ և հաղորդավար։ Նախկինում եղել է Hoory ընկերության գործադիր տնօրենը, աշխատել է որպես ռազմավարական խորհրդատու SoftConstruct ընկերությունում և ապատեղեկատվության ու ռազմավարական հաղորդակցության փորձագետ՝ IRI Armenia-ում։
2006–2018 թվականներին աշխատել է «Նորավանք» հիմնադրամի Տեղեկատվական հետազոտությունների կենտրոնում՝ որպես տեղեկատվական և կիբերանվտանգության ավագ փորձագետ։ Ղեկավարել է նաև Հայաստանի ծրագիրը «Էլեկտրոնային հասարակությունների զարգացումը Հարավային Կովկասում» TACIS ծրագրի շրջանակում և աշխատել «Քաղաքացիական հասարակության ինստիտուտ» ՀԿ-ում՝ որպես ծրագրի ղեկավար։
Դասավանդման ոլորտում Սամվել Մարտիրոսյանն ունի բազմամյա փորձ։ 2011–2020 թվականներին դասախոսել է Երևանի պետական համալսարանի Ժուռնալիստիկայի և Սոցիոլոգիայի ֆակուլտետներում, իսկ 2011–2019 թվականներին՝ Երևանի պետական լեզվաբանական համալսարանի PR և տեղեկատվության ֆակուլտետում։ Նա նաև աշխատել է որպես դասընթացավար Skill կրթական հարթակում և «Այլընտրանքային ռեսուրսներ մեդիայում» ծրագրում։ 2017–2019 թվականներին եղել է «Para TV» առցանց հեռուստատեսության «Մեդիագրագիտություն» հաղորդման հեղինակն ու հաղորդավարը։
Կրթությունը ստացել է Երևանի պետական համալսարանի Մաթեմատիկայի ֆակուլտետում՝ 1990–1995 թվականներին ստանալով բակալավրի աստիճան։ 1995–1997 թվականներին ուսումը շարունակել է Հայաստանի պետական ճարտարագիտական համալսարանի Մաթեմատիկայի ֆակուլտետում՝ ստանալով մագիստրոսի աստիճան, իսկ 1997–1999 թվականներին՝ ինժեներ-հետազոտողի որակավորում։
Սամվել Մարտիրոսյանի մասնագիտական գործունեության հիմնական ուղղություններն են կիբերանվտանգությունը, տեղեկատվական անվտանգությունը, մեդիագրագիտությունը, ապատեղեկատվության վերլուծությունը, ռազմավարական հաղորդակցությունը և թվային կրթությունը։
